Kiyevdə Azərbaycanın GUAM-a sədrliyi dövründəki prioritetləri müzakirə edilib

22:48 | 20 Noyabr, 2019

Noyabrın 20-də Ukraynanın paytaxtı Kiyevdə keçirilən GUAM-ın Milli Əlaqələndiricilər Şurasının 51-ci iclasında Azərbaycanın quruma sədrliyi dövründə həyata keçiriləcək layihələr müzakirə edilib.
AZƏRTAC xəbər verir ki, iclasda çıxış edən Xarici İşlər nazirinin müavini Mahmud Məmməd-Quliyev Azərbaycanın sədrliyi dövründə enerji, nəqliyyat, infrastruktur, gömrük və ticarət sahələrində layihələrə böyük diqqət yetiriləcəyini bildirib. GUAM-a üzv ölkələr arasında razılaşdırılmaqda olan sənədlərin imzalanması nəzərdən keçiriləcək.
Qeyd edək ki, GUAM-a sədrlik 2020-ci ilin yanvarın 1-dən Azərbaycana keçəcək.
İclasda, həmçinin yaxın vaxtlarda GUAM-ABŞ, GUAM+Yaponiya formatında görüşlərin keçirilməsi müzakirə edilib. GUAM+Kanada formatında görüşün təşkili üçün danışıqların aparıldığı vurğulanıb.

Emil Hüseynli
AZƏRTAC-ın xüsusi müxbiri
Kiyev